Sa do që të përpiqemi t’i mbajmë të shëndetshëm vogëlushët tanë ka ende shumë mundësi që ata të sëmuren duke u ftohur apo me grip gjatë vitit të parë të jetës së tyre. Ftohja e zakonshme nuk përbën ndonjë rrezik të madh pasi edhe pse nuk ka kurë për të, ka mënyra të ndryshme për t’i bërë ata të ndihen rehat. Por ndonjëherë simptomat e ngjashme me ato të ftohjes së zakonshme mund të jenë “maska” për një sëmundje shumë më serioze.
Sipas “American Academy of Pediatrics” virusi respirator syncytial (VRS) është një nga shkaktarët më të zakonshëm të infeksioneve në rrugët e frymëmarjes tek fëmijët. Shumica e fëmijëve infektohen nga virusi gjatë vitit të parë të jetës dhe i vuajnë pasojat e sëmundjes gjatë vitit të dytë. Dr. Octavio Ramilo nga spitali i fëmijëve “Nationwide” në Ohio, thotë se në moshën 2 vjeçare 90 deri në 100% të fëmijëve kanë pasur të paktën një infeksion të shkaktuar nga VRS.
Sipas ekspertëve, VRS është shkaku kryesor se përse fëmijët përfundojnë në spital. “Centers for Diseases Control and Prevention” vlerëson se vetëm në SHBA rreth 2.1 milion fëmijë shkojnë në spital për shkak të këtij virusi. Dhe meqënëse simptomat e këtij virusi janë të njëjta me simptomat e një ftohje të zakonshme si ethet, kullimi i hundëve, kolla dhe irritimi i fytit, shumë prindër presin që gjendja të përkeqësohet përpara se të marrin masa.
Edhe përse jo të gjitha rastet kanë nevojë për kujdes spitalor disa kategori janë më të rrezikuara se të tjerët. Foshnjet nën 3 muajsh janë të rrezikuar pasi mushkritë e tyre nuk janë ende të zhvilluara mjaftueshëm. Gjithashtu rreziku është më i lartë për fëmijët e lindur prematurë apo për ata që kanë lindur me probleme në frymëmarrje ose në zemër.
Edhe pse nuk ka ende nje vaksinë për këtë virus ekspertët i sygjerojnë prindërve të kenë kujdes me higjenën e duarve, kontaktet me personat e sëmurë si dhe të pastrojnë me kujdes lodrat dhe shtëpitë e tyre. Prindërit duhet të jenë akoma më vigjilentë gjatë stinës së dimrit kur ky virus është në pikun e tij.