Niveli parësor shëndetësor është fronti i parë i parandalimit dhe trajtimit të sëmundjeve për qytetarët në Kosovë.
Qytetarët anekënd Kosovës për problemet e tyre shëndetësore fillimisht kërkojnë ndihmë në ambulancat apo qendrat e mjekësisë familjare, për t’u trajtuar më pas në nivelet tjera, shkruan Gazeta Shneta.
Në komunën e Prishtinës niveli parësor është i organizuar në rrjetin e institucioneve që përfshinë Qendrën Kryesore të Mjekësisë Familjare (QKMF), 14-të Qendra të Mjekësisë Familjare (QMF) dhe 15-të Ambulanca të Mjekësisë Familjare (AMF).
Në QMF 5 e cila gjendet në lagjen “Dardania” punon mjekja Akile Rexha, specialiste e mjekësisë familjare.
Doktoresha Akile është vlerësuar me performancë të shkëlqyer gjatë këtij viti, ndërsa vetëm javën që shkoi ajo ka vizituar 280 pacientë, me një mesatare prej 56 pacientësh në ditë.
Ndryshe në nivelin parësor të shëndetësisë në Prishtinë është edhe Qendra e Mjekësisë Urgjente, e cila intervenon në rastet urgjente në rajonin e Prishtinës. QMU ka një flotë prej dhjetra autoambulancave dhe mesatarja e arritjes në vendin e ngjarjes është 7 minuta. /Gazeta Shneta/
