Kardiokirurgu i QKUK-së Dr. Ramë Alaj vjen në rubrikën Mjeku i Javës në Gazetën Shneta ku flet për sëmundjet e zemrës dhe trajtimin e tyre në Kardiokirurgji.
Dr. Ramë Alaj ka diplomuar në Fakultetin e Mjekësisë në Universitetin e Prishtinës në vitin 2011 ndërsa specializimin nga Kardiokirurgjia e ka përfunduar në dhjetor 2019. Në vitin 2020 është punësuar në Kliniken e Kardiokirurgjisë dhe vazhdon studimet e doktoratës si PhD kandidat pranë Universitetit të Prishtinës.
Dr. Ramë Alaj ka të botuar 13 punime shkencore si bashkautor dhe ka qenë pjesëmarrës në 9 prezantime të ndryshme në simpoziume dhe konferenca ndërkombëtare. Dr. Ramë Alaj ka ndjekur trajnime të ndryshme të organizuara nga EACTS (European Association for Cardio-Thoracic Surgery) me tema si kirurgjia e aortës, riparimi i valvuleve dhe qasje minimale.
Në intervistën për Gazetën Shneta, Alaj flet për sëmundjet e zemrës, faktorët e rrezikut dhe trajtimin e tyre në Shërbimin e Kardiokirurgjisë në QKUK.
Alaj thotë se në QKUK trajtohen shumë probleme që lidhen me zemrën dhe enët e gjakut të zemrës. “Bajpasi i artereve koronare (CABG) dhe operacionet për trajtimin e sëmundjes së valvuleve (riparimin apo zëvendësimin e tyre) janë llojet më të zakonshme të operacioneve të zemrës”, thotë ai.
Por cilët janë faktorët e rrezikut më të shpeshtë që çojnë drejt sëmundjeve të zemrës.
“Mbipesha, pasiviteti fizik, ushqimi jo i shëndetshëm dhe pirja e duhanit, diabeti melit, janë faktor rreziku për sëmundjet e arterieve koronare. Një histori familjare e sëmundjeve të zemrës gjithashtu rrit rrezikun për CAD, e që veçanërisht një histori e tillë haset më shumë rreth moshës 50 vjeçe ose më e re. Sa i përket aparatit valvular janë edhe mosha me e vjetër si dhe disa infeksione të tilla si ethet reumatizmale”, shpjegon Alaj.
“Te gjitha këto sëmundje mund të trajtohen në Shërbimin e Kardiokirurgjisë QKUK”, ka bërë të ditur kardiokirurgu.
Ai ka thënë se momentalisht në vendin tonë nuk kryhet kardiokirurgjia e pediatrisë si dhe transplantimi i zemrës apo pajisjet ndihmëse të zemrës (left ventricular asit device – LVAD), right ventricular asit device – RVAD).
Alaj ka këshilluar qytetarët që të shmangin faktorët e rrezikut të përmendur më lartë.
“Të shmangen faktorët e riskut të lartcekur dhe të fillojnë kontrollet sistematike të hershme sidomos e atyre me anamneze pozitive familjare”, ka thënë ai. /Gazeta Shneta/