Përvoja e shtatzënisë është unike për çdo çift. Krahas lumturisë dhe emocioneve të bukura, ardhja e një foshnje mund të sjellë edhe stres fizik, financiar dhe emocional.
Gjatë kësaj periudhe, mund të vini re më shumë mosmarrëveshje mes jush dhe partnerit, krahasuar me zakonet e përditshme. Edhe pse grindjet janë normale në marrëdhënie, duhet të dini se konfliktet e shpeshta mund të jenë të dëmshme për fëmijën.
Ekspertët shpjegojnë se grindjet dhe stresi gjatë shtatzënisë mund të shkaktojnë ankth dhe depresion tek nënat, dhe ndikojnë drejtpërdrejt në zhvillimin e fetusit — nga truri deri te sistemi imunitar. Disa nga efektet më të zakonshme janë:
Zhvillimi i kufizuar i trurit – Stresi dhe zemërimi pengojnë zhvillimin optimal të trurit të foshnjës. Kjo mund të ndikojë në inteligjencën (IQ) dhe në aftësinë për të menaxhuar emocionet më vonë në jetë.
Deformime fizike – Dhuna fizike ose tensioni ekstrem rrit rrezikun e lindjes me komplikacione, peshë të ulët të foshnjës, lëndime dhe gjakderdhje.
Dobësimi i imunitetit – Stresi i tepërt mund të dobësojë sistemin imunitar të foshnjës, duke e bërë atë më të ndjeshëm ndaj sëmundjeve dhe problemeve shëndetësore në të ardhmen.
Ndryshime fiziologjike dhe biologjike – Zemërimi rrit rrahjet e zemrës, presionin e gjakut dhe hormonet e stresit, duke shkaktuar ngushtim të enëve të gjakut. Kjo ul furnizimin me oksigjen dhe gjak në mitër, duke ndikuar negativisht në zhvillimin e fetusit.
Si pasojë mund të shfaqen gjithashtu probleme shëndetësore tek nëna, si ulçera, astmë, hipertension, dhimbje koke, çrregullime të tretjes apo probleme me lëkurën. /Gazeta Shneta/