Mungesa e barnave ka qenë çdo herë sfidë për pacientët në të gjitha institucionet shëndetësore publike, por edhe për personelin shëndetësorë.
Institucionet shëndetësore në vend asnjëherë nuk kanë qenë të furnizuara 100 përqind me barna nga Lista Esenciale e Barnave si dhe materialeve shpenzuese ndonëse premtime janë dhënë nga secila qeveri.
Kujdesi Parësorë Shëndetësore, Spitalet Rajonale dhe Klinikat në Qendrën Klinike Universitare të Kosovës nuk janë të furnizuara me materialet më elementare, duke përfshirë jodin, penjt kirurgjikal, infuzionet, shpatulla druri e gjilpërat e në anën tjetër nga Ministria e Shëndetësisë thonë se furnizimi me barna është arritur deri në 70 përqind ndërsa për materiale shpenzuese deri në 85 përqind.
Duke u nisur nga fakti që qytetarët vazhdojnë të blejnë barna, anëtari i Shoqatës së Pacientëve, Muhamedali Kodra, ngrit dyshimet nëse furnizimi është bërë deri në 70 përqind, ashtu siç thonë nga ministria.
“Dilema është se sa përqind është plotësuar ajo listë. Ministria po pretendon se po i plotëson nevojat rreth 70% por ne i kemi dyshimet tona. Duke u nisur nga fakti se sa barna blejnë qytetarët, ne dyshojmë që rezultati është invers: 70% blejnë qytetarët e 30% i mbulon ministria. Nëse jo edhe më keq”, u shpreh ai në një prononcim për Gazetën Shneta.
Ndërsa për të dal nga gjithë kjo situatë ai thotë se institucionet shëndetësore në vend duhet të pavarësohen pasi që, sipas tij, nuk është gjë e duhur që institucionet të varen nga të tjerët për të ofruar shërbime shëndetësore.
“Dalja nga kjo gjendje është reforma. Decentralizimi dhe pavarësimi i institucioneve shëndetësore. Institucionet shëndetësore duhet të pavarësohen dhe duhet t’i marrin përgjegjësitë që u takojnë për të ofruar shërbime të kompletuara gjegjësisht të integruara për qytetarët dhe të paguhen sipas shërbimeve që ata i ofrojnë”, tregon ai./Gazeta Shneta/