Efektet anësore negative dhe keqinformimi në rrjetet sociale po bëjnë që shumë gra të reja të mos i besojnë më pilulës kontraceptive.
Kur u prezantua për herë të parë në vitet 1960, pilula ishte revolucionare për autonominë riprodhuese dhe fuqizimin e grave.
Kohët e fundit, megjithatë, ajo është bërë burim mosbesimi, pasi shumë gra raportojnë se ndihen më të ngarkuara sesa të çliruara nga rreziqet e mundshme, raporton Euronews Health transmeton Gazeta Shneta.
“Arsye për të hequr dorë nga pilula” – titullohet një video në TikTok me 18,000 shikime, ku një grua tregon përvoja negative, përfshirë humbjen e dëshirës seksuale. Një tjetër video shfaq fotot “para dhe pas” të një të reje, me përshkrimin: “shenjë që të mos fillosh pilulën nëse nuk do të shtosh 12 kg”.
Përderisa zhgënjimet nga kujdesi shëndetësor i pamjaftueshëm për gratë i shtyjnë ato të kërkojnë zgjidhje online, ato gjithashtu bëhen më të prekshme ndaj dezinformatave.
“Gratë e reja janë në përgjithësi më të kujdesshme ndaj medikamenteve, dhe rrjetet sociale amplifikojnë tregimet rreth efekteve anësore si shtimi në peshë, ndryshimet e humorit apo rreziqet e rralla, por serioze, si mpiksjet e gjakut,” tha për Euronews Health, Ying Cheong, profesore e mjekësisë riprodhuese në Universitetin e Southampton, Mbretëria e Bashkuar.
Rritja e ndikimit të rrjeteve sociale dhe influencerëve të “wellness”-it ka sjellë një bum përmbajtjesh shëndetësore – veçanërisht për tema të nënstudiuara, si endometrioza dhe menopauza.
“Shëndeti i grave ka qenë historikisht i nënfinancuar. Kur buxhetet e spitaleve shkurtohen, gjinekologjia është zakonisht e para që preket, duke lënë gratë përballë pritjeve të gjata të papranueshme,” tha Cheong.
Këto, së bashku me dezinformimin online, kanë rritur përdorimin e aplikacioneve të gjurmimit të ciklit menstrual, që ndihmojnë në identifikimin e ditëve më fertile. /Gazeta Shneta/