Inspektoriati Sanitar e ka mbyllur një dhomë në Klinikën e Neurologjisë ndërsa katër të tjera janë jashtë funksionit për shkak të kundërmimit të aromave të pakëndshme brenda këtyre dhomave.
Sipas drejtorit të klinikës, Edmond Komoni, gjatë inspektimit Inspektoriati Sanitar ka vërejtur se në njërën dhomë kundërmimi ka qenë më i rëndë dhe si pasojë është mbyllur ndërsa tri dhomat e tjera janë jashtë funksionit.
“Inspektoriati Sanitar e ka vërejtur këtë dukuri në momentin e inspektimit ku në njërën nga dhomat ka qenë më e theksuar anadaj e ka mbyllur për përdorim për pacient deri në rinovim. Meqenëse problematika është e ngjashme edhe në 3 dhomat tjera ku kundërmimet janë më të rralla dhe kohբpaskohe, Inspektorët nuk i kishte mbyllur zyrtarisht, por na kanë rekomanduar që të mos përdoren deri sa të rregullohen të gjitha”, tha Komoni për Gazetën Shneta.
Komoni gjithashtu sqaron se objekti tani më i ka kaluar 40 vite të ndërtimit dhe disa nga instalimet janë të vjetëruara dhe ka vështirsi në mirëmbajtje.
Katër dhomat kanë nga një shtrat dhe banjo brenda hapësirës dhe shfrytëzohen për rastet apo diagnozat më specifike neurologjike.
“Ndërkohë përgjegjësit e ShSKUK-së ekipi i ka kryer disa punime në dhomën e mbyllur, por ende nuk është përfunduar për funksionalizim”, thuhet po ashtu në përgjigje.
Drejtori tregon se aktualisht klinika është në mungesë të katër shtretërve, dhe se një situatë të tillë janë duke u munduar të menaxhojnë në mënyrë të duhur që t’i mbulojnë të gjitha nevojat e pacientëve.
Gazeta gjithashtu ka tentuar të marrë edhe një prononcim nga Inspekoriati Sanitar por të njejtët nuk janë përgjigjur. /Gazeta Shneta/