Shumë nëna të ardhshme kuptojnë rëndësinë e kujdesit për shëndetin që paraqitet edhe para shtatzënisë. Shëndeti dhe stili i jetesës gjatë periudhës së para-konceptimit, pra para se të ndodhë shtatzënia, lidhet jo vetëm me shëndetin e nënës gjatë shtatzënisë, por edhe me shëndetin e foshnjës gjatë gjithë jetës së saj.
Megjithatë, një video virale në TikTok thekson rëndësinë e shëndetit të babait gjatë kësaj periudhe, duke argumentuar se ai ka po aq ndikim në mirëqenien e foshnjës dhe në rezultatet e shtatzënisë së nënës, shkruan The Conversation përcjell Gazeta Shneta.
Në video, një djalë i ri shprehet se burrat duhet të përgatiten fizikisht para se të përpiqen për një fëmijë, duke lidhur çrregullimet si preeklampsia dhe të përzierat e mëngjesit me shëndetin e tyre. Ai pretendon se 50-60% e epigjenetikës së foshnjës vjen nga babai.
Megjithëse disa shprehje në video u pritën me skepticizëm, kërkimet shkencore mbështesin shumicën e tyre.
Studimet tregojnë se stili i jetesës dhe sëmundjet kronike të babait gjatë periudhës para-konceptimit, si obeziteti dhe hipertensioni, lidhen me rritjen e rrezikut të preeklampsisë tek partnerja.
Po ashtu, baballarët që ushtrojnë rregullisht kanë fëmijë me më pak defekte lindjeje, ndërsa ata që pinë duhan ose janë mbipeshë para konceptimit kanë më shumë gjasa që fëmijë të kenë në të ardhmen probleme shëndetësore.
Epigjenetika, që tregon ndryshimet në shprehjen e gjeneve pa ndryshuar kodin gjenetik, luan një rol kyç në lidhjen mes shëndetit të babait dhe zhvillimit të fetusit.
Faktorët e jetesës, si stresi apo duhanpirja, ndikojnë në epigjenetikën e spermës dhe funksionin e placentës, duke ndikuar në rrezikun e preeklampsisë dhe shëndetin e fëmijës.
Megjithëse nuk ka ende studime që tregojnë qartë se ndryshimet në stilin e jetesës të babait përmirësojnë këto rezultate, është e qartë se ndalimi i duhanit, kontrolli i sëmundjeve kronike dhe aktiviteti fizik janë të rëndësishme për shëndetin e të gjithë familjes dhe rritjen e shanseve për konceptim të suksesshëm. /Gazeta Shneta/