Për nënat në pritje të fëmijës, vitamina D është e rëndësishme për shëndetin e tyre dhe të foshnjës gjithashtu.
Një studim zbulon se kjo lëndë ushqyese kritike nuk është vetëm jetike për rritjen, por gjithashtu ndikon në inteligjencën e një fëmije, shkruan Studyfinds.org përcjell Gazeta Shneta.
Studiuesit nga Instituti i Kërkimeve për Fëmijët në Seattle thonë se nënat me nivele më të larta të vitaminës D gjatë shtatzënisë priren të kenë fëmijë me rezultate më të larta të IQ.
Melissa Melough, autorja kryesore e studimit, shton se kjo lidhje shfaqet në mënyrë specifike tek fëmijët e grave me ngjyrë.
Studimi zbulon se mungesa e vitaminës D është një problem i zakonshëm tek gratë shtatzëna, por nënat e ardhshme zezake janë në rrezik më të lartë.
“Pigmenti i melaninës mbron lëkurën nga dëmtimi i diellit, por duke bllokuar rrezet UV, melanina gjithashtu redukton prodhimin e vitaminës D në lëkurë. Për shkak të kësaj, ne nuk ishim të befasuar kur pamë nivele të larta të mungesës së vitaminës D tek gratë shtatzëna me ngjyrë në studimin tonë. Edhe pse shumë gra shtatzëna marrin një vitaminë para lindjes, kjo mund të mos korrigjojë mungesën ekzistuese të vitaminës D”.
Për të mësuar më shumë rreth komplikimeve të shtatzënisë KLIKO KËTU.
Përpara se të zbulohej kjo lidhje me inteligjencën e ardhshme, studimet e mëparshme kanë treguar se marrja e mjaftueshme e kësaj lënde ushqyese ka disa përfitime. Një studim zbuloi se mungesa e vitaminës D gjatë procesit të zhvillimit çon në ngecje të rritjes dhe rrezik më të lartë për obezitet.
Në studimin e ri, hulumtuesit shqyrtuan të dhënat prind-fëmijë nga studimi i kushteve që ndikojnë në zhvillimin neurokognitiv dhe të mësuarit në fëmijërinë e hershme.
Raporti studioi gratë shtatzëna duke filluar nga viti 2006 dhe i ndoqi ato dhe fëmijët e tyre gjatë disa viteve të ardhshme.
Pas kontrollimit të disa faktorëve që ndikojnë në IQ, ekipi i Melough zbuloi se nivelet më të larta të vitaminës D gjatë shtatzënisë kishin një lidhje me IQ më të lartë te fëmijët nga katër deri në gjashtë vjeç.
Studiuesit paralajmërojnë se gjetjet tregojnë për një lidhje midis ushqyerjes para lindjes dhe inteligjencës, por nuk japin një shkak.
“Mungesa e vitaminës D është mjaft e përhapur,” shpjegon Melough. “Lajmi i mirë është se ka një zgjidhje relativisht të lehtë. Mund të jetë e vështirë për të marrë vitaminën D të mjaftueshme përmes dietës dhe jo të gjithë mund ta kompensojnë këtë boshllëk përmes ekspozimit në diell, kështu që një zgjidhje e mirë është të merrni një suplement.”
“Dua që njerëzit të dinë se është një problem i zakonshëm dhe mund të ndikojë në zhvillimin e fëmijëve,” përfundon autorja e studimit.
Mungesa e vitaminës D mund të ndodhë edhe nëse hani një dietë të shëndetshme. Ndonjëherë lidhet me stilin tonë të jetesës, pigmentimin e lëkurës ose faktorë të tjerë jashtë kontrollit tonë.
Studimi shfaqet në revistën ‘The Journal of Nutrition’. /Gazeta Shneta/