Fëmijët e lindur me prerje cezariane kanë pesë herë më shumë gjasa të zhvillojnë alergji deri në moshën dyvjeçare, krahasuar me ata të lindur në rrugë vaginale ose natyrale.
Ky është përfundimi i një studimi të ri të kryer nga hulumtuesit në Spitalin Henry Ford, i paraqitur në takimin vjetor të Akademisë Amerikane të Alergjisë, Astmës dhe Imunologjisë në San Antonio, shkruan Medical News Today, transmeton Gazeta Shneta.
Ky studim përforcon gjetjet e mëparshme që lidhin lindjen me prerje cezariane me një rrezik të shtuar për astmë, alergji ushqimore dhe probleme të tjera imunitare në vitet e para të jetës.
Sipas autores kryesore, Dr. Christine Cole Johnson, rezultatet mbështesin hipotezën e higjienës, e cila sugjeron se mungesa e ekspozimit të hershëm ndaj mikroorganizmave ndikon negativisht në zhvillimin e sistemit imunitar dhe rrit gjasat për alergji.
Ajo thekson se kalimi i foshnjës nëpër kanalin e lindjes mundëson kontakt me baktere të dobishme që ndihmojnë në formimin e imunitetit.
Ndërsa tek fëmijët e lindur me prerje cezariane, traktet e tyre gastrointestinale paraqesin një lloj mikrobiome “në rrezik”, që mund t’i bëjë më të ndjeshëm ndaj prodhimit të antitrupave Imunoglobulinë E (IgE) kur bien në kontakt me alergjenët.
Dihet se rritja e niveleve të IgE lidhet ngushtë me shfaqjen e astmës dhe alergjive të tjera. /Gazeta Shneta/