Një studim i ri nga Pennington Biomedical Research Center ka zbuluar se shëndeti metabolik i grave para dhe gjatë shtatzënisë ka ndikim më të madh tek rreziku për komplikacione sesa kontrolli i thjeshtë i shtimit në peshë.
Sipas të dhënave të publikuara në JAMA Network Open, gratë me obezitet metabolikisht të pashëndetshëm kishin më shumë gjasa të zhvillonin diabet gestacional, krahasuar me ato që kishin obezitet por pa faktorë të tjerë metabolikë.
Studiuesit analizuan 400 gra shtatzëna me obezitet dhe zbuluan se, megjithëse pjesëmarrëset me obezitet të pashëndetshëm fituan rreth 37% më pak peshë gjatë shtatzënisë, ato ishin dyfish më të rrezikuara për të zhvilluar diabet gestacional, shkruan MedicalXpress transmeton Gazeta Shneta.
Në total, 24% e tyre u prekën nga diabeti, kundrejt 10% të grave me obezitet metabolikisht të shëndetshëm.
“Fetusi nuk ‘ndjen’ kilogramët, por ushqehet nga glukoza dhe lipidet që qarkullojnë në trupin e nënës. Nëse këto janë të larta, rreziku për komplikacione rritet. Kjo tregon se nuk mjafton vetëm të kontrollojmë peshën, por duhet të fokusohemi tek përmirësimi i parametrave metabolikë që në fillim të shtatzënisë,” – shpjegoi Dr. Emily Flanagan, drejtuese e Laboratorit të Fiziologjisë Zhvillimore në Pennington Biomedical.
Ekspertët theksojnë se ndërhyrjet e hershme që synojnë kontrollin e nivelit të sheqerit dhe yndyrnave në gjak mund të përmirësojnë ndjeshëm shëndetin e nënës dhe foshnjës, duke reduktuar ekspozimin e zgjatur ndaj rreziqeve metabolike./Gazeta Shneta/