Tashmë që kanë kaluar ditë nga ngjarja e rëndë e djegies totale të kullës Grenfell në Londër, mediat britanike shkruajnë për secilin prej individëve të përfshirë në ngjarjen e tmerrshme që u mori jetën dhjetëra personave.
Së fundmi mediat kanë shkruar për rastin e një djali që u shndërrua në hero pasi shpëtoi nënën e tij nga flakët.
24-vjeçari Shekeb Neda ka zbritur nga kati i 24-t nënën e tij invalide, e cila për shkak të një sëmundje muskujsh nuk mund të ecte.
Ai e mori nënën 55-vjeçare, Flora, në shpinën e tij dhe mes tymit e flakëve e zbriti dhe nxori jashtë godinës që po digjej.
Por e gjitha kjo nuk ka shkuar aq mirë për djaloshin, i cili për shkak të tymit të tepërt që ka thithur dhe djegieve të pësuara ka përfunduar në koma në spital.
“Ai është një hero. Mes kaosit dhe ulërimave të dhjetëra personave ai mori nënën e tij nga kati i 24-t në tokë”,- ka thënë një i afërm i familjes.
Tashmë që flakët janë shuar, autoritetet mendojnë se numri i të vdekurve mund të shkojë deri në 100 pasi shumë prej individëve të humbur supozohet se janë djegur në katet e sipërme dhe trupat e tyre do të jetë e vështirë të identifikohen./Tetova Sot/
