Aktualisht në Spitalin e Gjilanit janë 119 mjekë, dhe pesë anesteziologë.
Me këtë staf, plotësohen 70% të kërkesave. Këtë e ka konfirmuar për Front Online, edhe drejtori i këtij spitali, Arsim Emini.
“Në Spitalin e Gjilanit janë 119 doktorë, ndërsa anesteziologë janë 5. Nuk janë mjaftueshëm. Me atë numër sa jemi, ia dalim me punu nga 100% kërkesat i plotësojmë me 70%”, tha ai.
Problemi kyç në Spitalin e Gjilanit është mosha e mjekëve.
Emini për Front Online thotë se mosha mesatare është 57 vjet.
“Në reparte kemi probleme, në Neurologji, Psikiatri, për mbulimin e kujdestarive, kuptohet me anesteziologë, në Urologji, probleme kemi në Kirurgji për shkak të moshës së mjekëve, që mosha e mjekëve është problem i krejt spitalit. Me theks të veçantë është në Kirurgji dhe në Urologji. Problemet me moshë i kemi në krejt spitalin, mosha mesatare diku është 57 vjet”, tha ai për Front Online.
Ai ka folur edhe për mungesën e barnave.
Emini thotë se kanë filluar të furnizohen me barnat që deri tani kanë qenë në mungesë.
“Herë pas here kemi mungesë të barnave por këto ditë janë duke u plotësuar, kemi probleme me penj, ka diçka probleme, barnat që si kemi pasë kanë filluar procedurat në SHSKUK, se kanë pasur problem me prokurim siç duket, edhe janë duke na furnizuar, relativisht mirë, unë besoj që kanë m’i rregullu këto punë”, shprehet ai për Front Online.
Drejtori Emini tha se do të punojnë dhe mundohen që të mos mbyllet asnjë repart i këtij spitali.