Qendra Klinike Universitare e Kosovës edhe sot po përballet me mungesë të medikamentit fentanyl. Programi i operacioneve është shtyrë sërish
Nuk ka kaluar as një javë nga hera e fundit kur klinikat e QKUK-së u detyruan të anulojnë ose shtyjnë programin operativ për shkak të mungesës së medikamentit fentanyl. E kjo situatë është përsëritur edhe sot, shkruan Gazeta Shneta.
Klinikat edhe sot janë detyruar që të shtyjnë operacionet pasi nuk janë furnizuar me anestetikun që mundëson që pacienti të mos ndjej dhimbje gjatë ndërhyrjes kirurgjike. Mjekëve u është thënë në ora 8:00 se do të furnizohen pas 1 ore, por një gjë e tillë ende nuk ka ndodhur. Menaxhmenti është duke bërë përpjekje që të huazojë ampula nga spitalet rajonale.
Gazeta ka raportuar edhe javën e kaluar për mungesën e këtij bari. Zyrtarët e QKUK-së deklaruan në një përgjigje me shkrim se klinikat do të furnizohen ditën e hënë me sasi të mjaftueshme për 6 muajt e ardhshëm.
Gazeta ka mësuar nga burime zyrtare se kompania përgjegjëse është arsyetuar se janë shkaktuar disa vonesa në tërheqjen e medikamentit nga Aeroporti Ndërkombëtar i Prishtinës. Por kjo nuk është hera e parë që QKUK mbetet pa këtë medikament. Situatë e tillë ka ndodhur edhe në muajin mars të këtij viti dhe poashtu vitin e kaluar. /Gazeta Shneta/