Spitali i Përgjithshëm në Mitrovicë në muajin mars njoftoi se për shkak të mungesës së anesteziologut nuk do të mund të bëhen shërbimet Gastroskopia dhe Kolonoskopia me anestezion.
Por, lidhur me këtë ushtruesja e detyrës së drejtoreshës në Spitali e Mitrovicës, Laura Nushi për Gazeta Shneta ka deklaruar se shërbimet e gastroskopisë dhe kolonoskopisë vazhdojnë të kryhen me kapacitet të plotë në Spitalin e Mitrovicës.
“Në 2 javët e para të këtij muaji (Prill) janë realizuar gjithsej 31 gastroskopi dhe 11 kolonoskopi”, ka deklaruar ajo.
Tutje sipas saj, realizimi i kolonoskopive me anestezion ka mundur të bëhet vetëm nëse ka pasur indikacion mjekësor dhe jo sipas kërkesave personale të pacientëve.
“Në 2 javët e para të muajit prill kemi pasur 3 anesteziolog që kanë operuar në 6 salla operative. Për këtë arsye realizimi i kolonoskopive me anestezion ka mundur të bëhet vetëm nëse ka pasur indikacion mjekësor dhe jo sipas kërkesave personale të pacientëve. Realizimi i këtyre procedurave endoskopike pa anestezion është bërë vazhdimisht sipas indikacioneve të vendosura nga mjekët”, u shpreh Nushi.
Por ndryshe thotë një vendim i repartit të anestezionit në këtë spital. Në këtë vendim të përpiluar nga mjeku Arbër Bardhaj dhe i nënshkruar nga shefi i repartit Fatmir Ujkani, bëhet e ditur se për këto dy shërbime nuk do të mundësohet anestezioni.
“Shërbimi i endoskopisë (Gastroskopia, Kolonoskopia) për arsye të mungesës së anesteziologut, nuk do të mund të marrin shërbime anesteziologjike”, thuhet në vendim të datës 25 mars 2024.
Tutje në këtë vendim janë ndarë edhe ditët e anestezionit për sallat e operacionit.
Sa i përket asaj nëse ndalimi i anestezionit do t’i detyrojë pacientët që të kërkojnë këtë shërbim në sektorin privat, ajo ka thënë se kjo nuk do të jetë e nevojshme pasi këto shërbime kryhen çdo ditë dhe lista të gjata të pritjes.
“Qytetarët e regjionit të Mitrovicës nuk kanë nevojë që për këto ekzaminime të drejtohen në institucionet private sepse ato kryhen çdo ditë tek ne dhe pa lista të gjata të pritjes. Në fakt për realizimin e Gastroskopisë në Spitalin e Mitrovicës nuk ka fare lista të pritjes ndërsa per realizimin e kolonoskopisë lista e pritjes është jo më e gjatë se 10 ditë”, u shpreh ajo.
Numri i anesteziologëve të punësuar në Spitalin e Përgjithshëm të Mitrovicës është aktualisht katër.
“Lidhur me numrin e anesteziologëve në spitalin tonë, aktualisht janë të punësuar 4 anesteziolog me kontratë të rregullt të punës ndërsa 2 javët e para të muajit prill njëri nga ta ka qenë ne pushim jashtë vendit”, përfundoi ajo. /Gazeta Shneta/