Një studim i ri ka zbuluar se njerëzit që përjetuan rritje të stresit, ankthit dhe depresionit në fillimin e pandemisë, ishin në rrezik më të madh për t’u prekur nga COVID-19.
Hulumtimi i botuar në Annals of Behavioral Medicine, zbuloi se shqetësimi më i madh psikologjik gjatë fazës së hershme të pandemisë u shoqërua ndjeshëm me pjesëmarrësit që raportuan më vonë infeksionin SARS-CoV-2, një numër më të madh simptomash dhe gjithashtu një nivel më të rëndë të gjendjes, transmeton Gazeta Shneta.
Profesoresha Kavita Vedhara nga Universiteti Nottinghamit, drejtoi studimin, së bashku me kolegët nga King’s College në Londër dhe Universiteti i Auckland në Zelandën e Re.
Hulumtimet e mëparshme kanë treguar se faktorët psikologjikë si stresi dhe mbështetja sociale lidhen me rritjen e ndjeshmërisë ndaj sëmundjeve virale të frymëmarrjes dhe simptomave më të rënda.
Gjatë pandemisë COVID-19, ka pasur një përkeqësim të mirë-dokumentuar të mirëqenies psikologjike dhe rritjes së izolimit social. Qëllimi i këtij studimi ishte të zbulonte nëse njerëzit që përjetuan këto vështirësi gjatë pandemisë ishin më të rrezikuar nga kontraktimi dhe/ose përjetimi i simptomave të COVID-19.
Ekipi i ekspertëve kreu një studim vëzhgues me afro 1,100 të rritur, të cilët përfunduan anketat gjatë prillit 2020 dhe vetë-raportuan incidencën e infeksionit COVID-19 dhe përvojën e simptomave përgjatë pandemisë deri në dhjetor 2020.
Modelet e regresionit janë përdorur për të eksploruar këto marrëdhënie, duke marrë parasysh faktorët demografikë dhe profesionalë.
Rezultatet treguan se infeksioni dhe simptomat COVID-19 ishin më të zakonshme tek ata që përjetonin shqetësime të larta psikologjike. /Gazeta Shneta/