Një studim i ri i Universitetit të Hertfordshire, i botuar në Journal of Psychiatric Research, tregon se gati një në tre të rritur (28%) kanë pasur vështirësi serioze në përshtatjen psikologjike pas përfundimit të pandemisë COVID-19.
Hulumtimi, i cili ndoqi 343 të rritur britanikë për gjashtë muaj gjatë heqjes së masave kufizuese, zbuloi se personat me prirje obsesive-kompulsive dhe më pak fleksibilitet kognitiv ishin më të rrezikuar. Këta individë shfaqën nivele më të larta ankthi, depresioni dhe stresi, duke e bërë tranzicionin edhe më të vështirë.
Edhe pse sjelljet e tilla si kontrollimi apo larja e tepërt u reduktuan me kohën, tipare më të thella si perfeksionizmi dhe ngurtësia mendore mbetën të pandryshuara, duke rritur rrezikun afatgjatë.
Sipas autorëve, përmirësimi i rregullimit emocional dhe i fleksibilitetit mendor është kyç për të ndihmuar njerëzit jo vetëm të rimëkëmben, por edhe të jenë më të përgatitur për kriza të ardhshme.
Ata rekomandojnë identifikimin e hershëm të tipareve të tilla për të ofruar ndërhyrje të synuara dhe mbështetje psikosociale./Gazeta Shneta/