Tetë pacientë me sëmundje të zemrës vdesin derisa ishin në listën e pritjes

2018-02-09 në ora 13:31

Tetë pacientë me sëmundje të zemrës kanë vdekur derisa ishin në listën e pritjes për intervenim në Klinikën e Kardiologjisë në QKUK.

Pacientët ishin në listë të pritjes që nga viti 2016, shkruan Evropa e Lirë, transmeton Gazeta Shneta.

Drejtori i Kardiologjisë Invazive Tefik Bekteshi, ka deklaruar se aktualisht në këtë listë janë rreth 70 pacientë.

Ai ka deklaruar se në listë kanë qenë 1502 pacientë, por pas furnizimit me material numri i pacientëve është reduktuar.

“Njerëzit që kanë vdekur e që kanë qenë në lista të pritjes, janë tetë pacientë. Bëhet fjalë për listën e cila ka qenë që nga vitit 2016. Vdekjet janë të tipit të ndryshëm dhe nuk kemi hyrë andej se çka e ka shkaktuar vdekjen, dhe nuk do doja të komentoj”, tha Bekteshi.

Klinika e Kardiologjisë është në pritje të ardhjes së pajisjes së angiografit nga Austria, e cila është blerë në vitin 2016, por që ende nuk është sjellë në Kosovë për shkak të zvarritjeve.

Ministri i Shëndetësisë, Uran Ismaili, është zotuar se kjo pajisje do të vijë dhe do të funksionalizohet në klinikë brenda 3 muajve.

Shkrimin e plotë mund ta lexoni në evropaelire.org.