Sot në Sheshin Ibrahim Rugova në Prishtinë u zhvillua manifestimi tradicional informativo-kulturor “Zbulimi i Hershëm – Mbijetesë”, organizuar nga “JETA/VITA”, në kuadër të Muajit Ndërkombëtar të Luftës Kundër Kancerit të Gjirit, nën patronatin e Presidentes Vjosa Osmani.
Ngjarja kishte si qëllim ndërgjegjësimin për rëndësinë e zbulimit të hershëm dhe trajtimit të kancerit të gjirit, shkruan Gazeta Shneta.
Presidentja Osmani vuri theks të veqantë te kontrolli i hershëm për zbulimin e kancerit të gjirit.
“Në këtë muaj nuk flasim vetëm për dhimbje, por flasim për guxim. Çdo ekzaminim i rregullt është një mundësi për jetë. Kanceri i gjirit nuk është fundi, por një kapitull sfidues që mund të përballohet.”
Drejtoresha e organizatës “JETA/VITA”, Nafije Latifi, foli për sfidat e sistemit shëndetësor dhe nevojën për shërbime të specializuara.
“Mungesa e stafit të mjaftueshëm, hapësirat e kufizuara trajtuese dhe mungesa e qendrave paliative për pacientët në faza të avancuara mbeten sfida kryesore.”
Latifi nënvizoi se investimi në staf të trajnuar dhe qendra të specializuara është jetik për përmirësimin e kujdesit dhe lehtësimin e vuajtjeve të pacientëve.
Përfaqësuesja e Onkologjisë, Dafina Ademi, shpjegoi përparimet e arritura se tani gratë janë më të vetëdijësuara për simptomat e kancerit.
“Mbijetesa më e mirë arrihet me një menaxhim gjithëpërfshirës zbulim i hershëm, diagnostikim në kohë, kirurgji dhe edukim shëndetësor. Tani gratë janë më të vetëdijshme për simptomat e kancerit dhe kemi më shumë aparatura diagnostike.”
Manifestimi përfshiu gjithashtu një marsh sensibilizues me pjesëmarrjen e qytetarëve dhe organizatave që mbështesin luftën kundër kancerit të gjirit, duke rritur ndërgjegjësimin publik dhe solidaritetin ndaj pacientëve./Gazeta Shneta/