Fatmir Plakiqit përfundimisht i shkëputet kontrata si drejtor i Fondit të Sigurimeve Shëndetësore

Fatmir Plakiqit i është shkëputur përfundimisht kontrata si drejtor në Fondin e Sigurimeve Shëndetësore.

Kështu ka njoftuar Bord Drejtues i këtij institucioni, duke thënë se vendimi është marr më datën 1 shtator, rreth një muaj pasi Plakiqi kishte marr njoftimin paralajmërues, shkruan Gazeta Shneta.

Plakiqi është shkarkuar nga kjo pozitë për shkak të dyshimeve për parregullësi në menaxhimin e qindra mijëra eurove në buxhetin për trajtimin e pacientëve jashtë vendit.

Për këtë çështje ka raportuar edhe Gazeta Shneta për një rast ku Fondi kishte paguar rreth 140 mijë euro për trajtimin e një pacienteje 10-vjeçare për tranplant të palcës, por në fakt pacientja nuk kishte arritur të kryente intervenimin pasi kishte ndërruar jetë. Megjithatë paratë ishin paguar nga Fondi në spitalin ‘Medical Park’ në Turqi.

Më poshtë gjeni njoftimin e plotë nga Fondi:

Bordi Drejtues i Fondit për Sigurim Shëndetësor, në mbledhjen e mbajtur me datë 21 korrik 2022, kishte suspenduar përkohësisht nga puna drejtorin e Fondit për Sigurime Shëndetësor z. Fatmir Plakiqi. Ndërkaq, në mbledhjen e mbajtur me 29 korrik 2022, Bordi Drejtues kishte marrë vendim për ndërprerjen e marrëdhënies së punës me z. Fatmir Plakiqi.

Në bazë të nenit 71, paragrafi 2 të Ligjit të Punës Nr. 03/L-212, Bordi Drejtues i Fondit për Sigurime Shëndetësore, ka dorëzuar njoftimin paralajmërues për ndërprerje të kontratës së punës z. Fatmir Plakiqi, për shkak të mos përmbushjes së kënaqshme të detyrave të punës në kuptim të nenit 70, paragrafi 1.4, nën paragrafi 1.4.2 të Ligjit të Punës.

Në respektim të dispozitave ligjore dhe pas përmbushjes së afateve të përcaktuara me ligj, Bordi Drejtues i Fondit për Sigurim Shëndetësor, në mbledhjen e mbajtur me datë 1 shtator 2022, ka nxjerrë vendim përfundimtar, me të cilin  përfundimisht i shkëputet kontrata e punës z. Fatmir Plakiqi.