Temperaturat e larta dhe valët ekstreme të të nxehtit mund të kenë ndikim edhe në shëndetin mendor të fëmijëve dhe të rinjve, duke rritur numrin e vizitave dhe shtrimeve spitalore për probleme të ndryshme psikike, tregon një studim i ri nga studiues të Universitetit të Sidneit në Australi.
Sipas hulumtimit, ditët me temperatura më të larta lidhen me rritje të rasteve të pranimit në spital për probleme të shëndetit mendor te fëmijët dhe adoleshentët. Studiuesit paralajmërojnë se me intensifikimin e ndryshimeve klimatike dhe valëve të të nxehtit, ndikimi në shëndetin e të rinjve pritet të bëhet edhe më i madh.
Studimi analizoi të dhënat për të gjitha shtrimet spitalore për çrregullime të shëndetit mendor te fëmijët deri në 12 vjeç dhe adoleshentët nga 13 deri në 17 vjeç në Uellsin e Ri Jugor të Australisë, gjatë periudhës 2001–2022.
Rezultatet treguan se gjatë ditëve më të nxehta u regjistrua rritje e pranimeve për disa probleme të shëndetit mendor, përfshirë ankthin, depresionin, çrregullimet e sjelljes, çrregullimet obsesivo-kompulsive dhe problemet që lidhen me përdorimin e substancave.
“Motet më të nxehta se zakonisht, të cilat po bëhen më të shpeshta për shkak të ndryshimeve klimatike, tashmë po ndikojnë në shëndetin mendor të disa prej të rinjve më të cenueshëm”, tha autori kryesor i studimit, Wen-Qiang He.
Sipas studiuesve, arsyeja e saktë pse temperaturat e larta lidhen me rritjen e problemeve të shëndetit mendor ende nuk është plotësisht e qartë. Megjithatë, ata sugjerojnë se nxehtësia mund të ndikojë në reagimin e trupit ndaj stresit, cilësinë e gjumit dhe gjendjen emocionale.
Temperaturat e larta e vështirësojnë rregullimin e temperaturës së brendshme të trupit, duke ndikuar në funksionimin e qelizave, proceset inflamatore, presionin e gjakut dhe furnizimin e trurit me oksigjen. Përveç efekteve fizike, nxehtësia mund të shkaktojë irritim, ulje të përqendrimit, lodhje dhe përkeqësim të gjumit.
Organizata Botërore e Shëndetësisë vlerëson se rreth një në shtatë fëmijë dhe adoleshentë të moshës 10 deri në 19 vjeç përjeton një çrregullim mendor, duke përbërë një pjesë të rëndësishme të barrës globale të sëmundjeve në këtë grupmoshë.
Autorët e studimit paralajmërojnë se ndikimi i vapës në shëndetin mendor mund të rritet në dekadat e ardhshme. Sipas projeksioneve të tyre, deri në fund të këtij shekulli, pranimet spitalore të lidhura me nxehtësinë mund të rriten ndjeshëm në varësi të nivelit të emetimeve të gazeve serrë.
Studiuesit bëjnë thirrje për masa parandaluese, duke përfshirë krijimin e hapësirave të freskëta në shkolla dhe qendra komunitare, përshtatjen e aktiviteteve shkollore gjatë periudhave me temperatura ekstreme dhe përfshirjen e shëndetit mendor në paralajmërimet publike për valët e të nxehtit.