Në përgjithësi, përdorimi i aspirinës gjatë shtatzënisë nuk rekomandohet, përveç rasteve kur ekzistojnë kushte të veçanta mjekësore. Megjithatë, aspirina me dozë të ulët, zakonisht nga 60 deri në 100 miligramë në ditë, konsiderohet e sigurt dhe shpesh rekomandohet nga mjekët për gra që kanë pasur humbje të përsëritura të shtatzënisë, çrregullime të koagulimit ose rrezik për preeklampsi.
Nga ana tjetër, përdorimi i dozave të larta të aspirinës mund të paraqesë rreziqe serioze, të cilat ndryshojnë sipas fazës së shtatzënisë, shkruan burimi Medical Xpress transmeton Gazeta Shneta.
Gjatë tremujorit të parë, dozat e larta lidhen me rritjen e rrezikut për humbje të shtatzënisë dhe defekte kongjenitale. Në tremujorin e tretë, këto doza mund të shkaktojnë mbyllje të parakohshme të një ene të rëndësishme në zemrën e fetusit, duke ndikuar negativisht në zhvillimin e tij.
Gjithashtu, përdorimi i zgjatur i dozave të larta gjatë shtatzënisë mund të rrisë rrezikun e gjakderdhjes në tru te foshnjat e lindura para kohe.
Në rastet kur aspirina është e nevojshme në fazat e fundit të shtatzënisë, mjekët zakonisht monitorojnë nga afër si nënën, ashtu edhe foshnjën për të shmangur komplikimet.
Administrata Amerikane e Ushqimit dhe Barnave (FDA) rekomandon shmangien e barnave anti-inflamatore josteroidale (NSAIDs), përfshirë aspirinën, pas javës së 19-të të shtatzënisë, përveç nëse këshillohet ndryshe nga mjeku. Kjo për shkak se ato mund të shkaktojnë probleme të rralla, por serioze në veshkat e fetusit dhe ulje të lëngut amniotik, duke rritur rrezikun për komplikime të mëtejshme. /Gazeta Shneta/