Kush është më i lumtur, burrat apo gratë? Hulumtimet tregojnë se kjo është një pyetje e komplikuar sepse çështja nëse meshkujt ose femrat janë më të lumtur nuk është me të vërtetë e dobishme, pasiqë në thelb, lumturia është e ndryshme për të dy gjinitë.
Sipas të dhënave të fundit, lumturia e grave ka rënë në 30 vitet e fundit. Hulumtimet tregojnë se gratë kanë dy herë më shumë gjasa të përjetojnë depresionin krahasuar me meshkujt. Dallimet gjinore në depresion janë të vendosura mirë dhe studimet kanë zbuluar se faktorët biologjik, psikologjik dhe social kontribuojnë në këtë pabarazi të humorit, transmeton GazetaShneta.
Por hulumtimi gjithashtu tregon se gratë kanë më shumë gjasa të përjetojnë emocione pozitive – të tilla si gëzimi dhe lumturia – krahasuar me burrat. Pra, duket se emocionet më intensive të grave e balancojnë përjetimin e depresionit. Gratë kanë më shumë gjasa të përpiqen dhe të marrin ndihmë dhe të jenë të hapura ndaj trajtimit, gjë që ua mundëson atyre ta rimarrin veten më shpejt, përcjellë The Conversation.
Studimet e hershme mbi gjininë dhe lumturinë gjetën gratë kanë më shumë gjasa të shprehin lumturinë, ngrohtësinë dhe frikën, e cila ndihmon në lidhjen sociale dhe duket më në përputhje me rolin tradicional dhe natyrën e tyre të përkujdesjes, ndërsa burrat shfaqin më shumë zemërim, krenari dhe përbuzje, të cilat janë më të qëndrueshme me rolin mbrojtës dhe sigurues të mirëqeniës të mashkullit.
Hulumtimet e fundit sugjerojnë se këto dallime nuk lidhen vetëm me shkaqe sociale, por kanë lidhje edhe me mënyrën se si funksionon truri i një femre dhe si ai një mashkulli.
Është gjithashtu e rëndësishme të kuptohet se përkundër këtyre dallimeve, përfitimet nga lumturia janë shumë të mëdha si për gratë ashtu edhe burrat. Lumturia është infektuese dhe ngjitëse – dhe ka një ndikim pozitiv në shëndetin dhe mirëqenien e të gjithëve./GazetaShneta/