“Sindroma e pelenës së kuqe” bën që pelenat dhe rrobat e bebit të marrin një ngjyrë rozë në të kuqe.
Sindroma shkaktohet nga një bakter i quajtur “Serratia marcescens” i cili nëse arrin të futet në rrugët e aparatit tretës, do bëjë që pelena dhe rrobat e bebit të marrin ngjyrën e sipërpërmendur.
Por mos u shqetësoni pasi sipas një studimi të ri nëse kjo është simptoma e vetme që bebi shfaq, atëherë nuk është nevoja të ndryshoni dietën tuaj apo të ndërprisni gjidhënien, madje nuk ka nevojë as për përdorimin e antibiotikëve.
Studimi i publikuar në gazetën “Breastfeeding medicine” analizoi një rast specifik të një bebeje 11 javësh si dhe shqyrtoi të dhënat e shënuara në literaturën mjekësore për 6 raste të tjera. Bebi nuk kishte asnjë simptomë tjetër, veç faktit se çdo rrobë apo pelenë që ai vishte merrte ngjyrë rozë pasi përdorej për 1 ditë.
Pas ekzaminimit të këtij rasti dhe rasteve të tjera të dokumentuara, studiuesit vunë re se pavarësisht nëse ishin trajtuar me antibiotikë apo jo, tek asnjëri nga bebet nuk ishin shkaktuar infeksione, pneumoni apo sëmundje të tjera të rrezikshme.
Megjithëse numri i rasteve për tu studiuar ishte i vogël, studiuesit dolën në konkluzionin se të gjithë bebet me sindromën e pelenës së kuqe duhet të jenë në monitorim të vazhdueshëm për të vlerësuar ecurinë e sëmundjes, por nëse nuk ka infeksione, përdorimi i antibiotikëve nuk është i nevojshëm.
Gjithashtu ata inkurajojnë nënat të vazhdojnë gji dhënien, dhe nëse përdorin pompa për të shtrydhur gjirin, duhet që t’i pastrojnë mirë ato.