Ledhatimi dhe prekja e butë, ndikojnë pozitivisht te foshnjet e porsalindura, sipas një studimi të ri.
Foshnjet e porsalindura e provojnë botën përmes prekjes. Hulumtuesit nga Nationwide Children’s Hospital në Ohio studiuan reagimin e trurit te 125 foshnje (përfshirë edhe ato të lindura parakohe) dhe zbuluan se ledhatimet apo prekjet e hershme janë të rëndësishme për bebet, transmeton Gazeta Shneta.
Sa më shumë që i përqafoni, ledhatoni apo i prekni butësisht, truri i tyre zhvillohet më shumë, sipas këtij studimi.
Si ndikon kjo?
Kur lindin foshnjat lindin kur truri dhe sistemi neurologjik i tyre, ende nuk janë zhvilluar plotësisht. Kjo vërehet sidomos tek foshnjat e lindura para kohe. Prekja e hershme është e rëndësishme për t’i ndihmuar foshnjat të arrijnë zhvillimin normal ndijor. Kur foshnjat përjetojnë një prekje të butë, duhet të ketë një përgjigje apo reagim nga truri i tyre.
Ajo që zbuluan studiuesit në Nationwide Children’s Hospital, ishte që disa foshnje kishin më pak përgjigje ndaj prekjes së butë. Për shembull, foshnjat e lindura para kohe kishin më shumë të ngjarë të reagonin më pak ndaj prekjes së butë sesa foshnjat e lindura me kohë, andaj edhe kanë më shumë nevojë për një gjë të tillë.
Nathalie Maitre, nga Nationwide Children’s Hospital & Vanderbilt University Medical Center, thotë “Nëse foshnjat e lindura para kohe marrin prekje të buta, mbështetëse, siç është kujdesi lëkurë-më-lëkurë nga prindërit, është thelbësore për ta ndihmuar trurin e tyre që t’i përgjigjet prekjes së butë në mënyra të ngjashme me ato të foshnjave që kanë qëndruar nëntë muaj në barkun e nënës.”
Nëse prindërit nuk mund ta bëjnë këtë, spitalet mund ta marrin në konsideratë sugjerimin që të angazhojnë terapistë apo profesionistë për foshnjet e lindura para kohe.
Pse ka rëndësi ky informacion për prindërit?
Nëse foshnja juaj ka lindur para kohe, apo ka ndonjë komplikim shëndetësor, ju mund t’ua lehtësoni edhe duke i prekur apo ledhatuar butësisht. Por edhe nëse bebeja ka lindur me kohë dhe nuk ka ndonjë komplikim, prapë ledhatojeni, sepse do t’i ndihmojë ta zhvillojë më shumë sistemin shqisor. Bebet e porsalindura kanë nevojë për më shumë dashuri! /Gazeta Shneta/