Mbajtjen e pozitave të dy bashkëshortëve, Lutfije Gashi e cila mbanë dy pozita në Spitalin Rajonal të Mitrovicës, si UD. Drejtoreshë e Administratës dhe Shërbimeve të Përbashkëta dhe Drejtoreshë për Buxhet dhe Financa, si dhe shefit të Shërbimeve Teknike, Ahmet Gashi, Agjencia Kundër Korrupsion e ka cilësuar si konflikt interesi.
Njësia e Shërbimeve Teknike është në varësi të drejtorisë së Administratës dhe Shërbimeve të Përbashkëta që i bie se Ahmet Gashi, bashkëshorti i Lutfije Gashit, të i raportojë gruas së tij, Lutfijës ndërsa kjo e fundit të bëjë vlerësimin dhe mbikqyrjen e bashkëshortit të saj, Ahmetit.
Me të marrë këtë informacion, Gazeta Shneta ka kërkuar sqarim nga Agjencia Kundër Korrupsion nëse barja e këtyre dy pozitave është konflikt interesi, dhe sipas përgjigjes së tyre barja e këtyre dy pozitave nga bashkëshortët Gashi është konflikt interesi dhe se duhet të evidentohet sa më herët që mundet.
Sipas AKK-së një rast i tillë e dëmton imazhin e institucionit, në këtë rast Spitalit Rajonal të Mitrovicës dhe e vë në mëdyshje transparencën.
“Si rezultat i funksionimit dhe detyrave ndërlidhëse të drejtorisë së Administratës dhe Shërbimeve të Përbashkëta në raport me njësin për shërbime teknike, situata e konfliktit “rast për rast” të interesit, do të paraqiteshin në mënyrë të përsëritur gjatë ushtrimit të funksionit publik dhe të rregullt, përsëritja e situatave të konfiliktit të interesit “rast për rast” shnderrohet në “konflikt të vazhdueshëm të interesit”, situatë kjo e cila duhet të shmanget sa më herët” – thuhet në përgjigjen e Agjencisë për Gazetën Shneta.
Ligji për Parandalimin e Konfliktit të Interesit në nenin 19 përcakton se “çdo udhëheqës i zyrtarit ose institucion udhëheqës merrë masat e nevojshme, të përshkallëzuara dhe proporcionale për të shmangur paraprakisht për çdo rast konfliktin real ose të mundshëm të interesave për shkak të zgjedhjes, emërtimit apo caktimit të detyrave ose përgjegjësive të caktuara të zyrtarit”.
AKK gjithashtu sqaron se ka kërkuar nga Spitali i Përgjithshëm në Mitrovicë që të shmangë çdo konflikt të interesit lidhur me vlerësimit apo raportimin dhe vendimarrjen në raport bashkëshorte – bashkëshort.
Lutfije Gashi në qershor të këtij viti është emruar UD drejtoreshë e Administratës dhe Shërbimeve të Përbashkëta në Spitalin e Mitrovicës, pasi që nga kjo pozitë ishte shkarkuar Ferdane Myftari e cila po ashtu ishte UD në këtë pozitë.
Pas shkarkimit nga drejtoresha ekzekutive e spitalit, Luljta Zhubi, Myftari pati adresuar ankesë në Ministri të Shëndetësis dhe në Shërbimin Spitalor Klinik Universitar. /Gazeta Shneta/