Në rubrikën Mjeku i Javës kësaj radhe vjen anesteziologu Shaqir Uka, shef i njësisë së Intensivës Qendrore në Qendrën Klinike Universitare të Kosovës.
Shaqir Uka është lindur në vitin 1966, shkollën e fillore dhe të mesme e ka kryer në Prishtinë, Fakultetin e Mjekësisë poashtu në Prishtinë e ka kryer ne vitin 1994, kurse specializimin nga Anesteziologjia dhe Mjekimi Intensiv e ka përfunduar në vitin 2004. Gjatë stazhit specialistik 1 vit ka qëndruar në Francë, në Grenoble 2001-2002 dhe 6 muaj ne Strasbourg në 2003, shkruan Gazeta Shneta.
Uka i ka dal zot zanatit të mjekut si profesionist por edhe si njëri humanist. Ai ka punuar në Shoqatën “Nëna Terezë” nga viti 1994-1999, në ambulanten “Dielli” nga viti 1997-1998 kurse me Mjeket Pakufi “Medecin du Monde” nga viti 1998-1999.
Në QKUK në Kliniken e Anestezionit dhe Mjekimit Intensiv është punësuar nga viti 2004 dhe nga viti 2019 ushtron detyrën e UD shef i Mjekimit Intensiv Qendrore. Uka e ka udhëhequr këtë njësi në një nga kohët më të vështira, atë të pandemisë kur fluksi i pacientëve ishte mjaft i madh dhe poashtu nevoja për anesteziologë për të menaxhuar rastet e rënda.
Në këtë njësi intensive me 21 shtretër menaxhohen pacientë të shumtë. Vetëm gjatë një muaji ka deri në 65 pranime të pacientëve me të gjitha patologjitë internistike, traumatologjike dhe postoperative.
Vetëm gjatë javës së kaluar janë pranuar 14 pacientë.
Uka njihet edhe për kontributin e tij në vitet e 90-ta në trajtimin e qytetarëve shqiptarë të plagosur nga forcat serbe. Ai është një nga mjekët që kishte trajtuar të plagosurit nga masakra e Dyzit në vitin 1999. /Gazeta Shneta/